Imaginat mai de 10 ans fa, lo concors d'escritura de l'IEO de Tarn a per tòca de balhar enveja d'escriure a totes los que pratican la lenga nòstra.

Tres categorias de participants: la dels dròlles , dins las classas de calandretas o bilinguas, la dels colegians e liceans dins lors corses opcionals e la dels estudiants e adultes, dins l'encastre de l'universitat e de lors taulièrs d'escritura.

Los tèmas son diferents d'un an a l'altre: l'ostal, los èstres fantastics, los sòmis, … e cadun s'exprimís en pròsa o en verses, liurament.

L'IEO de Tarn es lo mèstre d'òbra d'aqueste concors, sostengut pel Conselh general de Tarn e lo Conservatòri dels musèus de Tarn. Lo Castèl del Cailà aculhís en mai los membres de la jurada del concors dins l'encastre d'una jornada festiva (danças, contes, passajadas poeticas, visitas del castèl e de sas mòstras, venda de produches labelizats en òc, preséncia d'editors occitans … eca).

Per l'edicion 2013, l'IEO 81, en partenariat amb lo Musèu del Cailar e lo Conselh general de Tarn, vos prepausa un concors d'escritura en occitan* (lengadocian) sul tèma Vertat e messorgas.

Podètz telecargar lo bulletin de participacion.

Entre-senhas : 
IEO Tarn
BP 14, 3 carrièra de la Tòrca - 81120 REIALMONT
Tel : 05 63 79 06 67    Corrriel: Aquesta adreça email es aparada contra los robots dels spammors, devètz activar Javascript per la veire.

 

Las edicions passadas

Per l'edicion 2012, lo tèma causit èra « Escriure » o « de la tauleta d'argèla a l'ordinator ». Totes sortas de supòrts son possibles: la sabla, l'argela, la pèira, lo papièr, la lausa, la fusta, la fotò, la videò, los supòrts numerics...

Totes los mejans d'expression son possibles: lo det, la man, la greda, la pluma d'auca, la pluma d'aur de l'estilò, la maquina a escriure, lo gredon de papièr, los gredons de colors, lo carbon, los pastèls, l'aparelh de fotòs, la camerà, l'Ipòd, l'ordinator, la webcam...
La jurada s'acampèt lo 4 d'abrial. La remesa dels prèmis del 10en concors se tenguèt lo 26 de mai al Castèl del Cailar Musèu de Guérin (Andillac), dins l’encastre de Festif'Oc !, organizat Conselh General de Tarn. Los tèxtes pemiats foguèron editats jos fòrma d'un libròt.


Per l'edicion de 2010, lo tèma causit èra « Territòri d'enfància ». La remesa dels prèmis pel 8en concors se tenguèt dissabte lo 5 de junh al Castèl del Cailar a Andillac, en presénça de :

  • Mossur Thierry Carcenac, President del Conselh General de Tarn,
  • Mossur Joan Gasc, ajunch a la Cultura,
  • Mossur Felipe Sour, encargat de mission per la Cultura Occitana.

L'imaginacion dels mainatges de l'Escòla bilingüa Ròcaguda (3 prèmis) espantèt lo public. Amai se remarquèran collegians e liceans.

E se saludèt lo primièr prèmi adulte Roger Joulia amb son tèxte « Fenèstras d'estelas ». Aital comença :
« Amont pel Segalar ont soi nascut, los ivèrns de la guèrra, li fasiàun freg que rufava.... embrandavan, del levant, las doas fenèstras de la sala, ramas de glaç, estelas de gibre, flors de cristal... de me levar n'aviái cap d'enveja mentre que se perlongava la flambor... ».

Lo libròt del tèxtes premits « Territòri d'enfància » se pòt crompar al Centre Cultural Occitan de l'Albigés (entres. 05 63 46 21 43).


En 2009, lo tèma èra « Los quatre elements ».
La remesa dels prèmis se tenguèt dissabte lo 16 de junh al Castèl del Cailar.
Puèi sul tèma dels quatre elements se balhèt una serada de lecturas e cançons amb l'IEO de Tarn e lo Triò Nòu Sòrres.